Arxila, memoria e futuro para o rural.

Os obradoiros de oleiría do Museo-Taller da Oleiría de Niñodaguia nacen coa vontade de recuperar e manter viva unha tradición que forma parte da identidade e da memoria colectiva desta terra. Traballar coa arxila é tamén recuperar saberes, poñer en valor o patrimonio e xerar novos espazos de encontro, aprendizaxe e creación.

A través dos obradoiros queremos contribuír á dinamización cultural e social de Niñodaguia, achegando a oleiría ás novas xeracións e a todas aquelas persoas interesadas en coñecer, experimentar e crear coas súas propias mans. Pero tamén queremos mirar cara ao futuro: facer da tradición unha ferramenta de desenvolvemento rural, creando actividade, fomentando a participación da comunidade e xerando novas oportunidades arredor da cultura, da artesanía e do territorio.

Recuperar o que fomos. Poñelo en valor no presente. Crear novas posibilidades para o futuro.

Porque manter vivo un oficio non é só conservar unha técnica. É manter viva unha comunidade, unha memoria e un territorio. Ven coñecer a oleiría de Niñodaguia. Ven facer comunidade arredor da arxila.