O espazo Andén 1º, situado ó carón do edificio de Correos da estación intermodal de Ourense – Empalme, acolle a partir das oito da tardiña deste venres 10 de xaneiro a performance “Poemática”. Mercedes Martínez Modroño, @lady.alpaca, poetisa e activista cultural, ecoloxista e social, recitará en vivo poemas da súa obra e implicará ó público que desexe participar nun Micro Aberto. Esta nova actividade do Andén 1º está organizada en colaboración co colectivo “Amigas das árbores”. A entrada é libre e gratuita, ata completar aforo, e os asistentes serán convidados a un caldo do Piñeiro.

Mercedes Martínez Modroño (A Coruña, 1968) vive na vertente ourensá da Ribeira Sacra desde 1.999. Pedagoga de formación, nos anos traballou no campo da comunicación turística, froito do que en 2014 publica “Viaxe desde os cantís á memoria”. Logo viría “Guía libre para entender Parada de Sil”. Colaborou co diario dixital Praza Pública e outros medios de opinión. Desde 2021, forma parte do dúo Versononía, onde combinan a música e a poesía. Recentemente presentou o seu primeiro poemario “A falta dun Edén, a terra” reúne algunhas das composicións que recita ao vivo https://www.instagram.com/p/CNFNqXbCWfu/