Orixinalmente a interpretación en público do tango era únicamente instrumental, ata a incorporación ás formacións do “estribillista”, heróico solista de voz que cantaba o estribillo tratando de facerse escoitar sobre o volume dos instrumentos da orquestra e o balbordo dos espectadores en locais ruidosos. Xurdiu logo a figura do “cantor nacional”, con máis intervención e respecto, que deviría no protagonismo acadado polo “cantor de orquestra”. Estas figuras, e a da muller como intérprete das letras, conforman a evolución do cantor de tango que Ricardo Coronel revisa neste novo episodio de Chamuyando. Escoitamos “Milonga del 900”, “El penado 14”, “Vieja luna”, “Puente Alsina”, “No aflojés” e, no aniversario da independencia da República, o himno da Arxentina interpretado por Mercedes Sosa.
