Juan de Dios Filiberto, compositor e célebre músico arxentino, foi importante na consolidación do tango como xénero e autor de temas clásicos como Caminito, Queixas de bandoneón ou Malevaje. De orixe xenovesa, naceu en 1885 no barrio bonaerense de La Boca. Mal estudante e rebelde, abandonou a escola con 9 anos e traballou dende neno en diversos oficios. De estibador no porto, ingresa no sindicato anarquista e participa en duras folgas. Descubre a música laburando no Teatro Colón e ingresa no Conservatorio ós 24 anos. Empeza a compoñer e funda a Orquestra Porteña, onde innovou na instrumentación empregada. En 1933, aparece en ¡Tango!, a primeira película sonora arxentina. Estivo á fronte da Orquestra Popular Municipal de Arte Folklórico, da Municipalidade de Buenos Aires, ata a súa morte en 1964. Filiberto foi un gran defensor dos dereitos intelectuais dos músicos. Ricardo Coronel viaxa pola biografía de Filiberto e canta Malevaje.
